1. <Iacobus>: dünan Goda e Söla: Yesus Kristus, glidom tribütis spearik degtel:

2. Lecedolsöd kodi freda gretik, o svists! if reafols ini blufods mödasotik!

3. bi sevols, das, if lekred olsik benosufon blufi, vedükons olis sufädikis.

4. Sufäd binonöd ye lölöfik, dat binolsös lölöfiks ä nendöfiks, e tefü nos nesaidolsös!

5. If ek olas labonöv defi sapa, begolöd täno oni Gode, kel givom oni valanes balugiko e nenleblamo; ed at polegivon ole.

6. Ab begolöd oni lekredölo, nen dot alseimik! ibä utan, kel doton, sümon ad levef mela, kel pamüfon mo e ge dub vien.

7. Soman no cedonöd, das odageton bosi de Söl!

8. Binon men miladälik, nefümik in kondöt okik.

9. Lobolsöd svisti bapik in utos, in kel stadon löpiko!

10. ab liegiki in bapikam omik! ibä, leigoäsä flor in yeb, opasetikon.

11. Ibä, if sol esülöpikon glutiko, ed esigükon yebi, tän i flor in on edofalon, e logot jönik okik emoikon. Leigoso liegikan ofainikon dü vegam okik.

12. Beatik man binom, kel benosufom blufodi; ibä if klülädos, das sufidom ta on, tän ogetom kronüli lifa, keli Söl epromom utanes, kels löfons omi.

13. Nek sagonöd, if pablufodon, das pablufodon fa God! ibä God no pablufodom dub bad, ed om it no blufodom eki.

14. Nö! alan pablufodon dub desir lönik okik, kel midugon e bätodon oni.

15. If poso desir pafölon, tän kodon sinodi, ed if sinod peduinon, tän oprodon deadi.

16. No pölolsöd, o svists palöföl obik!

17. Givot gudik alik, legivot lölöfik alik, kömon löpao de Fat litas, in kel ni votikam, ni jad güikama dabinon.

18. Ma vil okik ejafädom obis dub vöd verata, dat öbinobsös äsvo balidans jafäbas okik!

19. Kludo, o svists palöföl obik! men alik binonöd vifik ad lilön, nevifik ad spikön, nevifik ad zunön!

20. Ibä zun mana no jenöfükon gidi Goda.

21. Deükolsöd kludo miotädi valik e seglofoti valik zuna, e lüsumolsöd sofälo vödi, kel pestäpodon oles, e kel fägon ad savön lanis olsik!

22. Binolsöd fölans vöda, e no te lilans, cütölo olis it!

23. Ibä if ek lilon vödi e no dunon ma on, tän sümon ad utan, kel logon in lok logodi voik okik,

24. ibä, if elogon oni, eglömon, vio elogoton, sosus emogolon.

25. Ab utan, kel eküpedon lonemi lölöfik, lonemi liba, e dunon laiduliko ma on; kel no binon lilan glömälik, ab ek, kel dunon, atan obinon beatik dub kondöt okik.

26. If ek pölacedon oki relöfiki, du no müton linegi okik, ab cüton oki it, tän relöf onik no labon völadi.

27. Relöf rafinik ä nenstenik kol God ä Fat binädon me stütedön nenpalanis e jiviudanis pö dränäls onsik, e me kipedön okis it no pemiotölis dub volanef.

1. O svists obik! no labolsöd pö lekred in Söl glorik obsik: Yesus Kristus, buükami pösoda alseimik!

2. If nu ini kobikam olsik man nükömom, kel labom linis goldik len doats e klotemi magifik, ed i pöfan nükömom in klotem pöfädik,

3. e lölogols vemo polani klotema magifik, e sagols: <Siedolöd oli sui seadöp gudik at>! e sagols pöfane: <Bleibolöd stanön us>! u:

<Seidolöd oli us lä futabam obik>!

4. No edistidols-li üfo ninälo, e cödot olsik no perübükon-li dub vätäls badik?

5. Dalilolsöd, o svists palöföl obik! God no evälom-li pöfanis vola ad binön liegiks in lekred, e gerans regäna, keli epromom utanes, kels löfons omi?

6. Ed ols ludigidols pöfani! Liegans no binons-li utans, kels bemastons olis? Ons no binons-li utans, kels sitatons olis lü cödöp,

7. e kels slänons nemi jönik, me kels panemols?

8. If too fölols lonemi regöfik ma vöd bibik: «Sötol löfön kemeni olik äsä oli it»! tän dunols gudiko.

9. If ye buükols balani bu votan, tän duinols sinodi, e papönols ma lonem as nefölans.

10. Ibä utan, kel fölon lonemi lölik, ab nefölon büdedi bal, evedon pönovik.

11. Ibä, om kel esagom: «No sötol dulterön»! i esagom: «No sötol deidön»! If nu no dulterol, ab deidol, tän evedol nefölan lonema.

12. Spikolsöd e dunolsöd as mens, kels pacödons ma lonem liba!

13. Ibä cödet nenmiserik palonülon tefü utan, kel no ejonülon miseri; miser pluon leigodü cödet.

14. Kisi frutos-li, o svists obik! va ek sagon, das labon lekredi, if dunon nosi? Lekred at kanon-li savön oni?

15. If nu hisvist u jisvist binon nüdik, e nelabon nulüdoti aldelik,

16. ed ek olas sagol: <Gololöd püdo, pavamükolöd e pasatükolöd>! e no givol one uti, keli koap neodon; kisi atos fruton-li?

17. So i lekred, kel no peyümäton ko duns, binon ito deadik.

18. Ud ek osagon: <Labol lekredi, ed ob dunob>. Jonolöd nu obe lekredi olik, nen duns olik! ed ob ojonob ole lekredi obik me duns obik.

19. Lekredol, das God balik dabinom. Dunol gudiko. I diabs lekredoms atosi, e dremoms sekü dred.

20. Ab vilol-li sevön, o men fopik! das lekred nen duns binon nenvöladik?

21. <Abraham>: lefatal obsik, no pegidükom-li dub duns okik, ven ävilom sakrifön su latar soni okik: <Isaac>?

22. Logol kludo, das lekred äkobovobon ko duns omik, e lekred omik pälölöfükon dub duns omik.

23. So vöd bibik päfölon, kel tonon: «<Abraham> älekredom in God, ed atos pelecedon gidik ome», e pänemom flen Goda.

24. Logols kludo, das men pagidükon dub duns okik, e no te dub lekred.

25. E jinepuedan: <Rahab> no pegidükof-li i leigoso dub duns okik, ven ägetedof lesedäbis ini dom okik, ed äkoedof mogolön onis ve veg votik?

26. Ibä leigoäsä koap nen lanöf binon deadik, lekred nen duns binon deadik.

1. No tidals mödik binomsöd bevü ols, o svists obik! ibä sevols, das pacödobs sevärikumo!

2. Ibä pö dins mödik obs valik tifalobs. If ek no tifalon pö spikam, tän binon men nendöfik, e fägon ad stirön koapi lölik okik.

3. Ekö! if lenükobs mütömis ini muds jevodas, dat lobedonsös obis! tän stirobs i koapis lölik onsik.

4. Logolsöd i nafis! Ifi binons vemo gretiks, ed ifi paföfiomufükons dub viens vemik, padugons medü stiröm pülik utöpio, kö stiran vilom ma plid okik.

5. Leigo i lineg binon limed smalik, e ga plunämädon. Logolsöd, vio fil smalik filidon kumi gretik boada!

6. So i lineg binon fil, fonät negida. Lineg biton bevü limeds obsik as cif, mioton koapi lölik obsik, e filidon goli menäda, e pefilidon it dub höl.

7. Natäli kinik sügafs e böds, kripafs e melafs bo labons, nims valik pateimons e peteimons fa menef;

8. ab linegi men nonik ekanon teimön: binon bad nemütovik, fulik me venen deidöl.

9. Me on lelobobs Godi ä Fati, e me on maleditobs menis ma mag Goda pejafölis.

10. Se mud ot bened e maledit kömons. O svists obik! atos no sötonöd binön so!

11. Fonons-li bo se hog ot fona vats svidik e biedik?

12. O svists obik! Figabim kanon-li prodön learaflukis? u vitid-li figis? So i fon salöfavata no prodon flifavati.

13. Kin olas binon-li sapik e täläktik? Jononöd atosi dub kondöt gudik, dub duns in sofäl sapik!

14. If labols jaludi biedälik e zuniäli in ladäls olsik, tän no pleidolsöd e no lugolsöd ta verat!

15. Ibä sap et no kömon löpao, ab binon taledik, sänsüelik, diabälik.

16. Ibä utöpo, kö jalud e zuniäl dabinons, i brul e duns badik valasotik dabinons.

17. Sap, kel kömon löpao binon güo bü val rafinik, täno püdiälik, pötik, süadöfik, fulik me miser e duns gudik, nepaletik, nensimulik.

18. Sek gida nu jenon in püd, e fruton onis, kels kipedons püdi.

1. Kis binon-li kod, das feits e komips dabinons bevü ols? No binos-li, bi in limeds olsik desirs valasotik komipons?

2. Desirols, e no labols; sasenols e jaludols, e no fägols ad dagetön; feitols e komipols, no getols, bi no plekols;

3. plekols e ga no getols. Kod atosa binon, das plekols badiko, bi desirols te ad fölön desiris olsik.

4. O hidulterans e jidulterans! no sevols-li, das löf dinas volädik binon nenlöf Goda? Klu utan, kel binon flen voläda, bitikon as neflen Goda.

5. U cedol-li, das utos binon vanik, kelosi bibapenäd sagon: «Lezilo Lanal, keli God ekoedom binön in obs, desiron obis».

6. Ab gevon obes benädi gretikum, demü atos sagon: «God taom ta pleidälans, ab gevom benädi mükanes».

7. Sumätükolsöd olis kludo Gode, e tadunolsöd diabi, ed ofugom de ols!

8. Nilikolsöd lü God, ed onilikom lü ols. Klinükolsöd namis olsik, o sinans! e rafinükolsöd ladälis olsik, o miladälans!

9. Bitolsöd as miserabans, lügodolsöd e violsöd! Smil olsik cenonöd ad lügod, fred olsik ad nenkurad!

10. Donükolsöd olis lo Söl! ed olöpükom olis.

11. No slänolsöd odis, o svists! Utan, kel slänon svisti okik, kel cödon svisti okik, slänon lonemi, e cödon lonemi. If nu cödon lonemi, no binon fölan lonema, ab cödal ona.

12. Bal binom Lonilonal ä Cödal; om, kel kanom savön e päridükön. Ab ol, kis binol-li, kel vilol cödön kemeni olik?

13. Benö! ols, kels sagols: <Adelo ud odelo otävobs lü zif at ud et, oblibobs us dü yel bal, otedobs us, ed odagetobs gaenodi>.

14. (Ols sevols nosi odela. Kis ga lif olsik binon-li? Binon vap, kel jonon oki dü timül, e täno nepubon dönu).

15. Plas sagols: <If Söl vilom, ed if obleibobs lifön, odunobs atosi ud etosi>.

16. Ab nu pleidülols me pleidül olsik. Pleidül somik valik binon badik.

17. Klu pro utan, kel sevon, das söton dunön gudiko, e no dunon osi, atos binon sin.

1. Benö! o liegans! Drenolsöd e yamolsöd dö mijenots, kels tädons olis!

2. Lieg olsik epuridikon, klots olsik pedälufidons dub tiens,

3. goldots e largentots olsik eruilons, e ruil at otemunon ta ols, ed okonsumon as fil midi olsik. Espälols onis ün dels lätik.

4. Ekö! mesed fa ols pegekipöl vobanas, kels ebefodons länedis olsik, flagon laodiko vinditi, e vokäd fodanas erivon lilis Söla milita lemödotas.

5. Elüxüödols su taled, ed enestönols, ladäls olsik edajuitons, äsä ün del puga.

6. Ecödetols, esasenols ritani, nendas etadunom olis.

7. Binolsöd kludo lunasufäliks, o svists! jü köm Söla! Ekö! feilan stebedom prodoti jerabik tala sufädölo, jüs udageton reini gölayelik e latayeliki.

8. Binolsöd i ols sufädiks, kuradükolsöd ladälis olsik! ibä köm Söla binon nilik.

9. No seifolsöd lo ods, o svists! dat no pecödolsös, ekö! Cödal stanom fo yan.

10. Züpolsöd, o svists obik! sami profetanas pö suf e sufäl omas, kels äspikoms nämätü Söl!

11. Ekö! nemobs beatikis utanis, kels ejonons sufäli. Elilols dö sufäl ela <Iob>, e sevols, vio Söl ekoedom fijenön fäti; ibä Söl fulom me kelied e miser.

12. Bü val, o svists obik! No yulolsöd! ni nämätü sül, ni nänätü tal, ni me yul votik alseimik: el si! olsik binonöd: si! El nö! olsik: nö! dat no reafolsös ini cödäd!

13. If ek bevü ols binon neläbik, tän plekonöd! if binon fredaladälik, tän kanitonöd psamis!

14. If ek bevü ols binon malädik, tän vokonöd bäldikünanis komota! Leadolsöd plekön omis pro on, posä eleüledoms oni nämätü Söl me leül!

15. E plek lekredik osavon malädani, e Söl okoedom löädön oni; ed if eduinon sinodis, tän ats popardons one.

16. Koefolsöd odes midunotis olsik, e plekolsöd pro ods, dat saunikolsös! Plek nämöfik ritana binon nämädik.

17. <Elias> äbinom men labü natäl, äsä ut obas. Äplekom, dat no reinosös! e sui taled no äreinos dü yels kil e muls mäl.

18. Ed äplekom dönu, e sil ägivon reini; e taled ädaglofükon prodi okik.

19. O svists! if ek bevü ols edeikon de verat, e votan leceinon oni,

20. sevolsöd täno, das utan, kel leceinon sinani de pöl onik, osavon lani atana de deadam, ed otegon mödoti gretik sinodas!

---------- oOo ----------

1. <Petrus>: paostolan Yesusa: Kristus väläbes, kels stebons as foginänans speariko in Pontän, Galatiyän, Kapadokän, Lasiyän e Bitüniyän,

2. kels pevälons ma büsev Goda: Fat dub saludükam me Lanal, ad lobedön Yesusi: Kristus ed ad kompenön pö spil bluda omik. Benäd e püd binonsöd aiplu lä ols!

3. Palelobomöd God ä Fat Söla obsik: Yesus Kristus! kel in miser mu gretik okik ekodom, das ädagetobs dönumotedi e speli lifik dub lelifikam Yesusa: Kristus se deadam,

4. dat getobsös geroti nerübik, nenstenik, nefainovik, kel blümon lü ols in sül!

5. kel pakipedon dub nämäd Goda in lekred, ad daget beata, kel osevädikon ün tim lätik.

6. Fredols demü atos, do ebo nu lügols, bi atos zesüdon demü dränäls valasotik.

7. If lekred olsik benosufon blufi, kelos labon völadi gretikum, ka gold nelaidik, do at peblufon in fil, tän atos ovedon lob, stim e glor pö pub Yesusa: Kristus.

8. Nendas elogols omi, löfols omi; nendas nu logols omi, lekredols in om, e fredols me fred nesagovik ä mu glorik,

9. bi nu edagetols zeili lekreda olsik: sav lanas olsik.

10. Savi at profetans esukoms ed evestigoms, ven äprofetoms, das benäd pögevon oles,

11. du ävestigoms ad tim e pöts kiniks, lanal Kristusa, kel äbinon in oms, äjonon ed ätemunon lesufi Kristusa e glori pos atos.

12. Pidasevädükos omes, das utos no äjonidon pro oms, ab pro ols, kelos nu papredon oles fa utans, kels egetoms dasevädükami dub Saludalanal, kel pelesedon de sül, ed ini kelos silanans desirons ad jedön logedi.

13. Demü atos kälälolsöd täläkto e nebrietiko, ad blümükön olis, e spetolsöd fümo benädi, kel pogevon oles pö pub Yesusa: Kristus!

14. Binolsöd äsä cils lobedik, no kondötolsöd, äsä ün tim büikum, kü nog äbinols nenseviks, ed äslafols de desirs olsik!

15. Vedolsöd ye nu saludiks dub kondöt lölik olsik, leigoäsä om, kel evälom olis, binom saludik.

16. Ibä in bibapenäd pepenos: «Vedolsöd saludiks, ibä ob binob saludik»!

17. If lüvokols omi asä Fati, kel cödom nenpaletiko alani ma kondöt onik, lifädolsöd täno dredo timi dü steb olsik!

18. bi sevols, das no pelelivükols se dajäf vanik vönaoloveik olsik dub bos nelaidüpik: largent u gold,

19. ab dub blud jerabik Kristusa, äsä dub ut jipüla neblamabik ä nenstenika;

20. kel sio pesevom bü jaf levala, ab pas nu, ün fin timas, pedasevädükom demü ols,

21. kels edagetols dub om lekredi in God, kel elelifükom omi se deadans, ed egevom ome glori; sodas lekred olsik binon leigo spel in God.

22. Posä nu eklinükols lanis olsik dub lobed verata pro svistilöf stedälik, sötols löfön odis leladöfiko,

23. as mens, kels dönu pemotols, no dub menäd nelaidüpik, ab dub vöd liföl ä laidüpik Goda.

24. Ibä «mid valik binon äsä yeb, e glor valik ona äsä flor in yeb; yeb efainikon, e flor in yeb edefalon;

25. ab vöd Söla blibon laidüpio». Ed at binon vöd, keli predobs oles.

1. Klemolsöd kludo badi valik, cüti valik, simuli, glöti, mispiki valik,

2. e desirolsöd äsä nulomotäbs miligi tikälik ä rafiniki, dat daglofolsös ad beat olsik!

3. if nemu egutols, das Söl binom benädik.

4. Kömolsöd lü om, lü ston lifik, kel fe pedeimom fa mens, ab pevälom e pestimom fa God,

5. e leadolsöd febumön olis it, asä stonis lifik, ad dom lanöfik, ad kultanam saludik, kel blinon sakrifotis lanöfik, kels plitons Godi dub Yesus: Kristus!

6. Ibä in bibapenäd pepenos: «Ekö! seitob in Siun gulastoni pevälöl ä jerabiki; utan, kel labon konfidi in on, no posäspetükon».

7. Pro ols, kels lekredols, atos binon stim, ab pro nenlekredans: «ston, keli bumans edeimoms, evedon gulaston»,

8. e «ston, ta kel jokoy, e klif skäna». Jokons ta on, bi no lekredons vödi.

9. Ad atos i pejonidons. Ab ols binols menäd pevälöl, kultanef regik, net saludik, pöp patiko pejonidöl ad sevädükön tugis oma, kel evokom olis se dag olas lü lit milagik okik.

10. Ols, kels seimna no äbinols pöp, nu binols pöp Goda; ols, kels seimna no äsufols miseri, nu pamiserols.

11. O palöfölans! lebegob oles, asä foginanes e lälödanes, ad no slafön de ledesirs midik, kels komipons ta lan,

12. ab ad kondötön gudiko zänodü pagans; dat ons tü del cödetama olelobonsös Godi, ven oseivons gudikumo dajäfi olsik, tefü kel nu mispikons as tefü ut midunanas, dub vobods gudik olsik!

13. Sumätöfükolsöd kludo olis büdüles menik valik, ma vil Söla, rege asä cifätane,

14. guveranes asä lesedäbes omik ad pönön midunanis, ed ad lobön brafanis!

15. Ibä atos binon vil Goda: seilükön dub vobods gudik spikoti fopik menas nentäläktik,

16. efe as mens libik, kelas lib no binon tegamäned bada, ab as dünans Goda.

17. Gevolsöd menes valik stimi, kel duton lü ons, löfolsöd svistefi, dredolsöd pro God, stimolsöd regi!

18. O dünans! sumätolsöd ko dred lü mastans olsik, no te lü utans, kels binons gudiks e sofäliks, ab i lü sevärikans!

19. Ibä atos vedon benäd, ven ek, sevedölo, das binon dünan Goda, sufälon dolis no pemeritölis.

20. Ibä lobab kinik dabinon-li if blebols sufädiks, if paflapols demü miduns olsik? Nö! if blebols sufädiks, if mutols sufön, du edunols gudiko, atos binon lo God benäd.

21. Lü atos ga pevokols, bi i Kristus esufom pro ols, eposbinükölo sami, dat ödunolsös me sam omik!

22. «No edunom sinodis, e cüt nonik ekömon se mud omik».

23. Ga no ägezanädom, ven päzanädom, e ven äsufom, no ätädom, ab älovegevom osi ome, kel cödom gidiko.

24. Epolom om it sinodis obsik in koap okik sui boad kroda, dat obs de sinods eliviköls ölifobsös pro gid! Pesaunükols dub flapastrips omik.

25. Ibä äpölavegols as jips, ab eflekols nu olis lü galedan ä dalogal lanas olsik.

1. Leigo i ols, o voms! mutols sumätöfön lü himatans lönik olsik, dat i semans, if no lobedoms vödi, dub kondöt jimatanas oksik nen vöd podivodükoms,

2. if logoms kondöti puedik dalestümik olsik.

3. Dek olsik no binädonöd me dins logotik; flök heras, züläg ko goldots, lenükam klotas,

4. ab dub ladäl ninälik, ko dek nerübik binäla sofälik ä takedika, kel binon völadik pö God!

5. Ibä so ettimo voms saludik edekofs okis, kels äspelofs ad God: äbinofs sumätöfiks lü himatans lönik oksik,

6. äsä <Sara> äsumätöfof lü <Abraham>, ed änemof omi söli. De of evedols jicils, if dunols gudiko nen dred alseimik.

7. Leigo i ols, o mans! kosädolsöd sapo ko jimatans olsik, asä ko menefadil fibikum, jonülolsöd stimi ofes, asä utanes, kels i binofs kegerans benäda lifa, dat no patupolsös pö plekam!

8. E fino, binolsöd baläliks, baisenäliks, fuliks me svistilöf, keliediks, flenöfiks!

9. No bläfolsöd badi me bad, zanädi me zanäd, ab güo benedolsöd! Ibä demü atos pevokols, dat ols it gerolsös benedi!

10. «Ibä utan, kel vilon löfön lifi, e logön delis läbik, stöpädonöd linegi okik de bad, lipis okik de spik cütöl!

11. Klemonöd badi, e dunonöd gudi; sukonöd püdi, e dayagonöd oni!

12. ibä logs Söla pelüodükons lü ritans, e lils omik lü plek, ab meug Söla binon ta utans, kels midunons».

13. E kin omiträiton-li olis, if steifols ad gudön?

14. Ab ifi mutolsöv sufön sekü gid, ga binols beatiks. No dredolsöd demü ons, e no pajeikolsöd!

15. Saludükolsöd Söli: Kristus in ladäls olsik! e klienolsöd, ad gidükön alane, kel flagon atosi, speli olsik, efe sofälo e stimölo,

16. e ko konsien gudik! dat utans, kels lunofons kondöti kritik gudik olsik, jemikonsös demü släns oksik!

17. Binos ga gudikum, das ols, if God vilom atosi, sufols, do dunols gudiko, kas dunols badiko.

18. Ibä i Kristus esufom seimna demü sinods; om, kel binom gidik, pro utans, kels negidons, ad blinön olis lü God. Mido vo pedeadom, ab pelelifükom lanöfo.

19. Lanöfo esevädükom igo menes in fanäböp sludi Goda

20. utanes, kels ibinons ettimo nelobediks, ven ün dels timü <Noe>, God pö lunasufäl okik ästebedom jüs rak pübumon, in kel anans, sevabo, mens jöl, pesavons de vat.

21. Gemag atosa nu bluned binon, kel savon obis, kel no binädon me moükam miota de koap, ab me lebeg Gode konsiena gudik dub lelifikam Yesusa: Kristus,

22. kel evegom sülio e binom detü God, e lü kel silanans, näms e nämäds sumätöfons.

1. Bi nu Kristus esufom koapo pro obs, i ols mutols vafön olis ko tikod ot, das utan, kel esufon koapo, edeimon sinodis,

2. dat lifonös me lif taledik okik no lunüpikumo ma ledesirs menik, ab ma vil Goda!

3. Ibä edulos saidiko lunüpo, das elifols ma meug paganas, das eslafikols de nestön, ledesirs, briet, lefideds, lebötids, e lugodikults sinik.

4. Nü no plu kekompenols in fiv et nestöna, efoginikons de ols, e slänons olis.

5. Ab ogidükons okis ome, kel blümom ad cödön lifölanis ed edeadölanis.

6. Ibä demü atos gospul i pepredon deadanes, dat, posä pemicödetons su taled ma mens, olifons as lanans ma God.

7. Fin vala binon nilik. Binolsöd kludo süeniks e nebrietiks, sodas kanols plekön!

8. Bu valikos löfolsöd odis ladöfiko, ibä löf tegon sinodis mödik!

9. Binolsöd lotidiäliks kol ods, nen mur!

10. Maä alan olas edageton tälenüli oka, dünonöd me at odis, as guvans gudik benäda difik Goda!

11. If ek spikon, spikonöd, äsva vöds binons de God! If ek dünon, dunonöd atosi, äsva näm kömon de God! dat God in val paglorükom fa Yesus: Kristus, kel dalabom mu laidüpo glori e nämädi! So binosös!

12. O palöfölans! No stunikolsöd, if fil bluföl drefon olis, äsva padrefols dub bos foginik!

13. Fredolsöd, maä kompenols pö sufs Kristusa, dat i yubolsös fredo pö dasevädükam glora omik!

14. Beatols, if palunofols demü nem Kristusa, ibä täno glor e lanan Goda binons in ols. Fe panofom fa ons, ab paglorükom fa ols.

15. Nek olas ga sufolöd as sasenan, u tifan, u midunan, u blamiälan dunas votanas!

16. Ab if sufols as kritans, tän no jemolsöd, ab glorükolsöd Godi, kodä polols digädiko nemi et!

17. Ibä tim ekömon, das cödetam oprimon in dom Goda; ed if at primon pö obs, lio täno fin obinon-li utanas, kels no elobedons gospuli Goda?

18. Ed if ritan pasavon töbo, lio täno utans, kels no lekredons Godi, e sinans, ovedons-li?

19. Klu utans, kels sufons ma vil Goda, lovegivonsöd lanis oksik Jafale fiedik e kondötolsöd gudiko!

1. As kebäldikünan ä temunan lesufas Kristusa, ed i as kompenan glora podasevädüköl, lebegob bäldikünanes bevü ols:

2. Galedolsöd jepi Goda, zänodü kel binols, e kel pelükonfidon oles, no pemütölo, ab libaviliko, no demü lugaenod, ab sekü divod;

3. no as reigans komota, ab as samans jepe!

4. Tän ogetols, ven legaledan kömom, kronüli nefainovik stima.

5. Leigo ols, o yunikumans! sumätolsöd sumätöfü bäldikumans; binolsöd ai mükiks kol ods; ibä «God taom ta pleidälans, ab gevom gönodis okik mükikanes».

6. Donükolsöd kludo olis sumätöfü nam nämik Goda, dat löpükomös olis pötatimo!

7. Jedolsöd kudis valik olas sui om, ibä kälälom olis!

8. Binolsöd nebrietiks e galäliks! Taan olas, diab, zitevom as leon leroröl, sukölo utanis, kelis kanom slugön.

9. Tadunolsöd omi, binölo nämiks dub lekred, e sevölo, das suf ot i pebligädon svistes olsik in vol lölik!

10. God benäda valik, kel evokom olis ad glor laidüpik in Kristus: Yesus, posä usufols dü tim brefik, om it oblümükom, ostütom, onämükom, ofümükom olis.

11. Glor e näm binonsöd mu laidüpio lü om! So binosös!

12. Dub <Silvanus>: svist fiedik olsik, cedob, epenob oles brefo atosi, stigädölo olis, e temunölo, das benäd, in kel binols, binom benäd veratik Goda.

13. Kesaludans in <Babylon> [= el <Roma> pagik] e son obik: <Marcus> glidons olis.

14. Glidolsöd odis me kid löfa! Püd binonöd lä ols valik, kels slopols Kristusi: Yesus!

---------- oOo ----------

1. <Simon Petrus>: hidünan ä paostolan de Yesus: Kristus utanes, kels edagetons lekredi ko ut obas leigavöladiki dub gid Goda obsik e Saval: Yesus Kristus.

2. Benäd binonöd lä ols, e püd pagevonöd oles dub sev Goda e Yesusa: Söl obsik!

3. Utosi valik, kelos binon zesüdik pro lif e relöf, näm Godik omik elegivon obes dub sev oma, kel evokom obis dub glor e tug okiks;

4. dub kels proms gretikün e veütiküns pegevons obes, dat övedolsös kekompenans de natäl Godik, ed öskeapolsös de korup sekü ledesir in vol dabinöl!

5. E demü atos mutols jäfön me töbid valik, ad läükön lä lekred olsik tugi, lä tug sevi,

6. lä sev okreigi, lä okreig laidäli, lä laidäl relöfi,

7. lä relöf svistilöfi, e lä svistilöf benodäli.

8. Ibä if atos valik binon, efe bundaniko, pö ols, tän atos no obinon lindifik e nenfrutik lü ols pro dasev Söla obsik: Yesus Kristus.

9. Utan, pö kel atos no binon, binon bleinik, binon lusuemik, bi eglömon, vio peklinükon de sinods vönädik okik.

10. Klu, o svists! töbidolsöd plüo mödikumo ad fümükön vokedi e väli olas! ibä so dunölo neai otifalols.

11. Somo poletols bundano ad nügolön ini regän laidüpik Söla obsik ä Savala: Yesus Kristus.

12. Kodü atos no vilob nedunön ad meibön oles ai dönu dinis valik at, do sevols onis, e binols fümäliks tefü verat, kel binon pö ols.

13. Ab lecedob osi bligi obik, dü tim, das binob in tänad at, ad koedön galön olis, dub meib atas oles;

14. bi sevob, das lüv tänada obik ojenon suniko, äsä Söl obsik: Yesus Kristus, esevädükom obe.

15. Osteifob ad kudön, das pos movegam obik, ofägols ai dönu ad memön atosi.

16. Ibä no esöspikobs märis käfo pedatikölis, ven esevädükobs oles nämädi e kömi Söla obsik: Yesus Kristus, ab posä ivedobs logamatemunans mayeda omik.

17. Egetom ga stimi e glori de God: Fat, ven vög äkömon lü om de Gloral sublimik: «Atan binom Son palöföl obik, keli plidob vemo».

18. E vögi at se sül äkömöli obs it elilobs, ven äbinobs ko om su bel saludik.

19. Labobs i vödi profetik dub atos fümikumi evedöli, tefü kel binos gudik, das demols oni asä liti, kel stralon in top dagik, jüs del oprimon e gödastel osülöpikon in ladäls olsik.

20. Bü val sevols, das profetam nonik penäda bibik leton pläni oknämätik,

21. ibä neföro profetam edavedon ettimo dub vil menas, ab pinügivölo fa Saludalanal, pesagon dub mens saludik nämätü God.

1. Bevü pöp i luprofetans ebinoms, äsä i bevü ols lutidals obinoms, kels onüdugoms kläno häretis dämüköl e kels onoädoms Mastani, kel eremom omis, e kels blinädoms okes päridikami sunik.

2. Mödikans osödunons nestönis omsik, e dub flun omas, vegam verata poslänon.

3. Ko labiäl oksik ocütoms tuflagedo olis me vöds käfik okas; ab sis lunüp cödet omas ya pelonon, e päridikam omas no omoblibon.

4. Ibä, ven God no espalom silananis esinöl, ab ejedom onis ini höl lü jänäds daga ad lovegivön onis lü cödetam lätik,

5. e no espalom volanefi vönik, ab ekipedom jölati di <Noe>: heroldan gida, ven äblinom letuvatami love vol nen-Godanas;

6. ven äcödetom zifis: <Sodoma> e <Gomorrha> ad päridikam, ed äzenolefilükom onis, älonülölo so onis as sam pro nen-Godans tima fütürik,

7. du äjelom eli <Lot>, kel pätomom dub dajäf nestönik nentütedanas,

8. (ibä man ritik at, kel älödom zänodü ons, pätomom aldeliko dub logam e lilam vobodas midunik onsik);

9. atos sinifon, das Söl sevom ad savön relöfanis se blufod, ed ad kipedön neritanis pönamio pro del cödetama,

10. pato utanis, kels, desirölo miotami, fölons ledesiris mida e nestümons reigi. Fopölo e rogölo, no geyilons ad lunofön gloris,

11. du silanans, kels binons ga nämädikums ä nämädikums ka ons no riskons ad sagön Söle tefü glors et cödoti lunoföl.

12. Ab ons it, äsä nims nentikälik, labölo lüäli ad fanön e distukön, e lunofölo utosi, kelosi no sevons, opäridikons in korup oksik,

13. dub atos getölo mibläfodi negida. Lecedons lüxüödi dü del juiti, binons miotäliks ä blamabiks, e nestönons ven lefidedons kobü ols.

14. Logs onas fulons me dulter, sinons nenropo; bätodons menis fibälik; ladäls onsik binons labiäliks; binons cils maledita.

15. Bi edeikons de vegam verätik, epölagolons, ed esuimons vegami ela <Balaam>: son ela <Beor>, kel älöfom mesedi negidik,

16. ab kel ägetom blami demü nefölot okik; lodotanim müätik, äspikölo ko vög menik, äneleton fopi profetana.

17. Binons fons nen vat, fogs dub tepavien pemoföls; dag dagikün pekipedon pro ons.

18. Ibä, bi luspikons püki pleidülik nensiämik, bätodons dub ledesirs midik e nepued onsik utanis, kels eskeapons töbo de mens pölagolöl et.

19. Promons ones libi, du ons it binons slafans korupa. Ibä binoy slafan de utos, dub kelos pekonkeroy.

20. If utans ga eskeapons dub sev Söla ä Savala: Yesus Kristus de miots volanefa, e pafanetons dönu dub ats, dubä pakonkerons, tän fät latikum onsik vedon badikum ka büik onsik.

21. Ibä binosöv gudikum pro ons ad no esevön vegi gida, ka, posä eseivons oni, deikons dönu de büd sanik peloveüköl.

22. Lü ons spiket pötöfon gideto: Dog, kel geflekon oki lü spukot lönik okik, e: Svin, posä pelavon, rölon oki dönu in släm.

1. At nu binon pened telid, keli penob oles, o palöfölans! In peneds bofik meibob oles ad kipedön meugi rafinik,

2. ed ad betikön vödis büikumo oles fa profetans saludik pesagölis, e büdi fa paostolans olsik peloveblinöli de Söl ä Saval.

3. Bü val ga sevols, das ün dels lätik kofans adabinons, kels okondötons lecäriko ma ledesirs oksik,

4. ed osagons kofölo: <Kiüpo nu prom köma omik ojenon-li? Ibä sis fats edeadoms, val bleibon binön, soäsä äbinon de prim jafa>.

5. Ibä utans, kels vilons sagön dinis somik, no küpons, das süls ädabinons vönao, e das tal pestukon de vat e me vat sekü vöd Goda,

6. e das vol ettimik dub vat petuvatöl epäridikon.

7. Süls e tal atimiks ye pespälons dub vöd ot pro fil, e pakipedons pro del cödetama e päridikama menas nen-Godik.

8. Ab dini bal, o palöfölans! no neküpolsöd, das pro Söl del bal binon äsvo yels mil, e yels mil binons äsvo del bal!

9. Söl no trögom pö föl proma okik, äsä semans cedons, ab binom lunasufälik kol obs, bi vilom, das anans no päridikons, ab das valans ovotükons meugi oksik.

10. Del Söla okömon äsä tifan, tü kel süls omoikons noidiko; binets posäkobotükons dub lefil; tal e vobots valik, kels binons su on, ofefilons.

11. If val nu padistukons so, viogretiks üfo dajäf saludik e relöf olsiks mutons-li binön,

12. ven stebedols ledesiro kömi dela Goda, ün kel süls omoikons in fil, e binets ofefilikons ed ofesmetons?

13. Ma prom omik ye spetobs sülis nulik e tali nulik, in kels gid odareigon.

14. Demü atos, o palöfölans! bi spetols atosi, steifolsöd mögiküno, das otuvom olis nenstenikis e neblamabikis in püd!

15. E dasevolsöd, das lunasufäl Söla obsik dünon ad beatükam olas, äsä i hisvist palöföl obsik: <Paulus> ma sap ome pegivöl epenom oles!

16. In peneds valik okik bespikom yegädi at; ab in ons dins fikuliko suemoviks dabinons; netäläktans e fibälans miükons siämi onas, äsä edunons tefü penäds votik, ad päridikam okas it.

17. Ols nu, o palöfölans! kels sevols büo atosi, kälälolsöd, das no paketirädols dub pöls nenlekredanas, e das no deikols de fümäl lönik olsik!

18. Ab daglofolsöd aiplu in benäd e sev Söla ä Savala obsik: Yesus Kristus! Glor binonöd, e nu, e laidüpio lü om! So binosös!

---------- oOo ----------

1. Kelos ädabinon de prim, kelosi elilobs, kelosi elogobs me logs obsik, kelosi elelogobs e nams obsik edoatons, tefü vöd lifa,

2. (ibä lif edasevädikon; elogobs oni, temunobs e dasevädükobs oles lifi laidüpik; äbinon lä Fat, e pedasevädükon obes);

3. kelosi elogobs ed elilobs, utosi nu sevädükobs i oles, dat labolsös kompeni ko obs, du obs i labobs kompeni ko Fat e Son omik: Yesus Kristus!

4. Penobs oles atosi, dat fred olsik binonös lölöfik!

5. E nun, keli elilobs de om, e keli sevädükobs oles, binon: God binom lit, e pülilot nonik daga binon in om.

6. If nu sagobsöv, das labobs kompeni ko om, e dajäfobs in dag, tän lugobsöv, no sagobsöv verati,

7. ab if dajäfobs in lit, äsä om binom in lit, tän labobs kompeni ko ods, e blud Yesusa: Kristus, Son omik klinükon obis de sinods valik.

8. If sagobsöv, das no labob sinodis, tän cütobsöv obis it, e verat no binonöv in obs.

9. If lekoefobsöv sinodis obsik, tän om, kel binom fiedik ä gidik, opardom sinodis obsik, ed oklinükon obis de negids valik.

10. If sagobsöv, das no esinobs, tän vedükobsöv omi lugani, e vöd omik no binonöv in obs.

1. O cils oba! penob oles atosi, dat no sinolsös! Ed if ek sinonöv, tän labobs lä Fat proani: Yesus Kristus, ritan.

2. Binom rekosil pro sinods obsik, e no te pro obsiks, ab i pro uts volanefa lölik.

3. E dub atos sevobs, das esevobs omi, if fölobs büdedis omik.

4. Utan, kel sagon: <Sevob omi>, e kel no fölon büdedis omik, binon lugan; in on verat no dabinon.

5. Ab pö utan, kel demon vödi omik, löf kol God evedon jenöfiko lölöfik. Dub atos sevobs, das binobs in om.

6. Utan, kel sagon, das blibon in om, kondöt onik muton binön äsä et oma.

7. O palöfölans! no penob oles büdedi nulik, ab bäldiki, keli elabols de prim; büded bäldik binon vöd, keli elilols.

8. Dönu penob oles büdedi nulik, kel binon veratik in om ed in ols, ibä dag pasetikon, e lit veratik ya stralon.

9. Utan, kel sagon, das binon in lit, e kel heton svisti okik, nog ai dabinon in dag.

10. Utan, kel löfon svisti okik, stebon in lit, nos in on skänon.

11. Ab utan, kel heton svisti okik binon in dag, e zigolon in dag; no sevon utöpio golon, ibä dag ebleinükon logis onik.

12. Penob oles, o svists! bi sinods pepardons oles nemü om.

13. Penob oles, o fats! bi esevols omi, kel dabinom de prim. Penob oles, o yunans! bi ekonkerols diabi.

14. Epenob oles, o cils! bi esevols Fati. Epenob oles, o fats! bi esevols omi, kel dabinom de prim. Epenob oles, o yunans! bi binols nämiks, bi vöd Goda blibon in ols, e bi ekonkerols diabi.

15. No löfolsöd volädi, ni utosi, kelos binon in voläd! If ek löfonöv volädi, tän löf pro Fat no binon in on.

16. Ibä utos valik, kelos binon in voläd: ledesir mida, ledesir logas e pleidül lifa, no licinon de Fat, ab duton lü voläd.

17. E voläd, ko utos, kelos binon desirabik in on, pasetikon; ab utan, kel dunon vili Goda, blibon laidüpio.

18. O cils! binos düp lätik; äsä elilols, das Kristusitaan kömom, nu Kristusitaans mödik esüikoms. Sekü atos sevobs, das binos düp lätik.

19. Esegoloms se zänod obas, ab no ädutoms lü obs. Ibä üf ädutomsöv lü obs, tän iblibomsöv lä obs. Ab atos ejenon, dat kleilikosös, das no valans dutons lü obs.

20. Egetols leüledami de Saludal, e sevols dinis valik.

21. No epenob oles, bi no sevols verati, ab bi sevols oni, e bi lug nonik binon se verat.

22. Kin binon-li lugan, if utan no binon lugan, kel noon, das Yesus binom Kristus? Atan Kristusitaan binom, kel noädom Fati e Soni.

23. Alutan, kel noädon Soni, i no labon Fati; alutan, kel kulton Soni, labon i Fati.

24. In ols utos blibonöd, kelosi elilols primao! If utos, kelosi elilols primao, blibon in ols, tän obleibols i dutön lü Fat e lü Son.

25. Ed atos binon prom, keli egevom obes: lif laidüpik.

26. Atosi epenob oles demü utans, kels pöladugons olis.

27. E leüledam, keli egetols de om, blibonöd in ols! No neodols, das ek lejonon olis, ab äsä leüledam omik elejonon olis dö dins valik, ed atos binon verat, no lug, ed äsä etidom oles, so bleibolsöd dutön lü om!

28. E nu, o cils! blibolsöd in om! dat, ven kömom, labobsös nenplafi, e no nedobsös yilidön jemiko pö köm oma!

29. If sevols, das binom gidik, tän sevols i, das alutan, kel dunon gidiko, edavedom se om.

1. Logolsöd, löfi viogretik Fat egevom obes, das panemobs cils Goda! e so binobs. Sekü atos volanef no sevon obis, bi no eseivon omi.

2. O palöfölans! nu binobs cils Goda, e kis obinobs no nog pesevädükos; sevobs ye, das, ven pasevädükos, obinobs sümiks äs om, bi ologobs omi, soäsä binom.

3. Ed alutan, kel labon speli at in om, klinükon oki, äsä om binom klinik.

4. Alutan, kel sinon, nefölon lonemi, ibä sinod binon nefölot lonema.

5. E sevols, das ekömom ad mosumön sinodis, ed in om sinod no dabinon.

6. Alutan, kel blibon in om, no sinon; alutan, kel sinon, no elogon omi, no eseivon omi.

7. O cils! nek pöladugonöd olis! Utan, kel dunon gidiko, binon gidik, leigoäsä om binom gidik.

8. Utan, kel dunon sinodi duton lü diab; ibä de prim diab sinom. Demü atos Son Goda ekömom ad distukön vobodis diaba.

9. Alutan, kel edavedon se God no dunon sinodi; ibä lüäl omik blibon in om; no kanon sinön, bi edavedon se God.

10. Dub atos, e cils Goda, e cils diaba binons sevädoviks: alutan, kel no dunon gidiko, no duton lü God, ed i no utan, kel no löfon svisti okik.

11. Ibä atos binon nun, keli elilobs primao, das sötobs löfön odis.

12. No binobsöd äsä <Cain>, kel ädutom lü diab, ed ädeidom blodi okik! e sekü kis ädeidom-li omi? Bi vobods omik äbinons badiks, ed uts bloda omik gudiks.

13. No stunolsöd, o svists! das volanef heton olis!

14. Obs sevobs sio, das eloveikobs de deadam ad lif, bi löfobs svistis. Utan, kel no löfon, blibon in deadam.

15. Alutan, kel heton svisti okik, binon sasenan, e sevols, das sasenan alik no labon dulöfiko lifi laidüpik.

16. In atos eseivobs löfi omik, das eklemom demü obs lifi okik. So i obs labobs bligi ad klemön demü svists lifis obsik.

17. If nu ek dalabon dabinotis volädik, e, du logon, das svist onik defädon, färmükon ladäli okik pro on, lio täno pö on löf pro God kanonöv-li binön dulöfik?

18. O cils! löfobsöd no me vöd e lineg, ab me dun e verato!

19. Dub atos osevobs, das kondötobs verato, ed okanobs takedükön ladälis obsik lo God,

20. bi, ifi ladäl micödon obis, God binom mödikum ka ladäls obsik, e sevom vali.

21. O palöfölans! if ladäl obsik no micödon obis, tän labobs nenplafi lo God,

22. e getobs de om utosi valik, kelosi begobs; bi fölobs büdedis e dunobs utosi, kelos pliton omi.

23. Ed atos binon büded omik, das lekredobs in nem Sona omik: Yesus Kristus, e löfobs odis, äsä ebüdom obes.

24. Utan, kel fölon büdedis, blibon in om, ed om in on. E sevobs, das blibom in obs, dub Lanal, keli egivom obes.

1. O palöfölans! no kredolsöd lanani alik, ab vestigolsöd lananis, va dutons lü God! ibä luprofetans mödik esüikoms in vol.

2. In atos memosevols lani Goda: lanan alik, kel lekoefon, das Yesus: Kristus ekömom in mid duton lü God,

3. e lanan alik, kel no lekoefon Yesusi, no duton lü God; atan duton lü Kristusitaan, dö kel elelilols, das ökömom; e nu ye binom in vol.

4. Edavedols se God! o cils! ed ekonkerols onis; ibä om, kel binom in ols, binom nämädikum, ka on, kel binon in vol.

5. Dutons lü utans, kels binons volädiks; sekü atos spikons püki voläda, e volanef dalilon onis.

6. Licinobs de God, ed utan, kel sevon Godi, dalilon obis; utan, kel no licinon de God, no dalilon obis. Dub atos sevobs, va duton lü utans, kels sevons verati, u lü utans, kels pölons.

7. O palöfölans! löfobsöd odis! ibä löf kömon se God, ed alan, kel labon löfi, edavedon se God, e sevon Godi.

8. Utan, kel no löfon, no eseivon Godi; ibä God binom löf.

9. In atos, löf Goda esevädikon lü obs, das elesedom Soni baliko pemotöli oka lü vol, dat lifobsös dub om!

10. In atos löf dabinon, no das elöfobs Godi, ab das elöfom obis, ed elesedom Soni okik ad rekosil sinodas obsik.

11. O palöfölans! ven God älöfom obis so vemo, tän i obs labobs bligi ad löfön odis.

12. Nek elogon föro Godi; if löfobs odis, tän God blibom in obs, e löf omik elölöfikon in obs.

13. Dub atos sevobs, das blibobs in om, ed om in obs, bi egivom obes dili Lanala okik.

14. Ed obs elogobs e temunobs, das Fat elesedom Soni okik as Saval lü vol.

15. Klu if ek lekoefon, das Yesus binom Son Goda, tän God blibom in on, ed on in God.

16. Ed obs eseivobs löfi, keli God labom pro obs, ed elekredobs oni. God binom löf, ed utan, kel blibon in löf, blibon in God, e God in on.

17. E so löf elölöfikon in obs, dat labobsös nenplafi ün del cödetama, ibä soäsä om binom, obs binobs in vol at.

18. Dred no yumäton ko löf; ab löf lölöfik moükon dredi; bi dred labon bosi pöna. Utan, kel dredon, no labon kludo löfi lölöfik.

19. Löfobs omi, bi om büikumo elöfom obis.

20. If ek sagon, das löfom Godi, e hetom svisti okik, tän binon lugan. Ek ga, kel no löfon svisti okik, keli elogon, no kanon löfön Godi, keli no elogon.

21. Büdedi at egetobs de om: «Utan, kel löfon Godi, söton löfön i svisti okik».

1. Alutan, kel lekredon, das Yesus binom Kristus, edavedon se God, ed alutan, kel löfon davedükani, löfon i utani, kel pedavedükon se om.

2. Dub atos sevobs, das löfobs cilis Goda, das löfobs Godi e fölobs büdedis omik.

3. Ibä me atos löf kol God binädon, das fölobs büdedis oma. E büdeds oma no binons fikuliks,

4. bi alutos, kelos edavedon se God, konkeron voli, ed atos binon vikod; utos, kel ekonkeron voli, lekred obas binon.

5. Kin votik binon-li vikodan vola, äsä utan, kel lekredon, das Yesus binom Son Goda?

6. Om binom utan, kel ekömom me vat e blud, Yesus: Kristus, no te me vat, ab e me vat e me blud; e Lanal binon temunan, das Lanal binon verat.

7. Ibä temunans kil dabinons, [in sül: Fat, Vöd e Saludalanal, e kil at binons: bal;

8. e temunans kil dabinons su taled,] Lanal, vat e blud, e kil at binons: bal.

9. If lüsumobs temunodi menas, temunod Goda labon völadi gretikum. Ibä at binon temunod, keli God egivom tefü Son oka.

10. Utan, kel lekredon Soni Goda, labon temunodi in ok it. Utan, kel no lekredon Godi, vedükon omi lugani, bi no elekredon temunodi, keli God egivom tefü Son oka.

11. E me atos temunod binädon: God elegivom obes lifi laidüpik, e lif at binon in Son oka.

12. Utan, kel labon Soni, labon lifi; utan, kel no labon Soni Goda, lifi no labon.

13. Atosi epenob oles, kels lekredols nemi Sona Goda, dat sevolsös, das labols lifi laidüpik, e dat lekredolsös nemi Sona Goda!

14. Me atos nenplaf binädon, keli labobs lo om, das, if begobs bosi ma vil omik, dalilom obis.

15. Ed if sevobs, das dalilom obis, ven begobs ome bosi, tän sevobs, das i dagetobs utosi, kelosi ebegobs ome.

16. If ek logon, das svist onik dunon sinodi, kel no binon dasinod, tän obegom, das givomös one lifi, sevabo, if no edunon dasinodi. Dasinod dabinon, e tefü at no sagob das mutoy plekön.

17. Negid alik binon sinod, ab sinods dabinons, kels no binons dasinods.

18. Sevobs, das alan, kel edavedon se God , no sinon, ab utan, kel edavedon se God, bleibon slopön omi, e diab no fägom ad gleipön oni.

19. Sevobs, das obs dutobs lü God, e volanef lölik stadon sumätöfü flun diaba.

20. Sevobs nu, das Son Goda ekömom, e das egevom obes dasevi, dat sevobsös Veratali, e dat dutobsös lü Veratal: Son omik: Yesus Kristus! Om binom God veratik e lif laidüpik.

21. O cils! prüdolsöd demü lugods!

---------- oOo ----------

1. Bäldikünan vome pevälöl e ciles ofik, kelis löfob in verat, e no te ob, ab i valans, kels eseivons verati,

2. demü verat, kel binon in obs, ed oblibon laidüpio in obs.

3. Benäd, miser, püd de God: Fat e de Yesus: Kristus, Son Fata binonsöd verato e löfo lä ols!

4. Efredükos obi vemo, das eplakob, das anans cilas olik kondötons in verat ma büded, keli egetobs de Fat.

5. E nu begob ole, o vom! no äsva penob ole büdedi nulik; binon büded, keli ya labobs primao, das löfobsöd odis!

6. E löf binädon me atos, das kondötobs ma büdeds omik. Atos binon büded, keli elilols primao, das dajäfols ma ons.

7. Ibä midugans mödik esüikoms in vol, kels no lekoefoms, das Yesus: Kristus ekömom mido. Atan binom midugan ä Kristusitaan.

8. Prüdolsöd, das no perobsös utosi, kelosi edagetobs dub vobods obsik, ab das getobsös mesedi fulik!

9. Alan, kel deikon de lejon Kristusa e no bleibon slopön oni, no duton lü God; utan, kel blibon in lejon Kristusa labon e Fati e Soni.

10. If ek kömon lü ols, e no slopon lejoni at, no getedolsöd oni ini dom olsik, e no sagolsöd one benokömaglidi!

11. ibä utan, kel sagon one benokömaglidi, kompenon pö vobods badik onik.

12. Labob nog dinis mödik, kelis mutob penön oles, ab no vilob dunön atosi me papür e nig; spelob ye ad kömön lü ols ed ad spikön mudöfo ko ols, dat fred obsik binonös lölöfik!

13. Cils söra pevälöl olik glidons oli.

---------- oOo ----------

1. Bäldikünan ele <Gaius> palöföl, keli löfob in verat.

2. O palöfölan! plekob demü ol, das ön tef alik stadolös beniko e binolös saunik, leigoäsä lan olik binon!

3. Ibä efredob vemo, ven svists äkömons ed ätemunons tefü verat olik, vio kondötol in verat.

4. No sevob fredi gretikum, ka lilami, das cils obik lifons in verat.

5. O palöfölan! dunol fiediko bligi me utos, kelosi dunol pro svists, ed igo pro foginänans.

6. Etemunoms kluo lo komotanef tefü löf olik. Odunol gudiko ad kälälön tävi omsik ön mod pro God digädik.

7. Ibä demü nem Kristusa esetävoms e lüsumoms nosi de pagans.

8. Labobs bligi ad lasumön fäti somanas, dat binobsös kevobans omas pro verat!

9. Epenob komote. Ab <Diotrephes>, kel vilom binön balidan bevü ons, no vilom getedön obis.

10. Sekü atos, ven kömob, oblamob omi demü utos, kelosi dunom, bi snätörom me vöds badik ta obs, e no kotenükölo oki ko atos, no getedom svistis ini dom okik, e neletom utanis, kels vilons dunön atosi, e sejoikom igo onis se komot.

11. O palöfölan! no södunolöd badi, ab gudi! Utan, kel dunon gudiko, duton lü God; utan, kel dunon badiko, no elogon Godi.

12. <Demetrius> egetom temunodis gudik tefü valans e tefü verat it. I obs temunobs atosi, e sevols, das temunod obsik binon verätik.

13. Mutob penön ole mödikosi, ab no vilob penön ole me nig e pen.

14. Spelob ad logön suno oli. Täno ospikobs mudöfo odes.

15. Püd binonöd lü ol! Flens glidons oli. Glidolöd flenis, alanis patiko!

---------- oOo ----------

1. <Iudas>: hidünan de Yesus: Kristus ä blod ela <Iacobus>, väläbes, kels pesaludükons fa God: Fat e pekipedons pro Yesus: Kristus.

2. Miser, püd e löf binonsöd lü ols bundaniko!

3. O palöfölans! bi nu steifob mu fefo ad penön oles dö beat kobädik obsik, lecedob osi zesüdiki ad penön oles stigädami, efe das mutols komipön pro lekred fifümiko saludanes pelovegivöl.

4. Ibä mens anik enüdranons smugo, kels ya peregistarons sis lunüp ad pacödetön, nen-Godans, kels migebons benädi Goda obsik ad nestön e noädons Mastali teik ä Söli obsik: Yesus Kristus.

5. Nu vilob memükön olis, du ya sevols fifümiko atosi valik, das Söl, posä esavom pöpi okik se Lägüptän, epäridükom pos atos utanis, kels no älekredons;

6. ed ekipedom silananis, kels no ekälälons reigi oksik, e kels elüvons lödöpis lönik oksik, pro cödetam tü del gretik pö dag in jänäds laidüpik;

7. äsä i els <Sodoma> e <Gomorra>, e zifs zü ons topöls, kels leigoäsä ons edunons nepuedi, ed efölons ledesiris tanatik mida; us binons as sams pöna me fil laidüpik.

8. Ön mod ot i ons, in drimäl oksik, vo miotons midi oksik, nedemons diniti e lunofons gloris.

9. Silanal: <Michael> nu, kel feiton ko diab dö koap ela <Moyses>, no äkünon ad sagön cödoti slänöl, ab äsagon «Söl pönomöd oli»!

10. Ons nu slänons utosi, kelosi no sevons, e me utos, kelosi, äsä nims nentikälik, sevons nato, päridükons onis it.

11. Vi! lü ons, ibä ebevegons vegi ela <Cain>, ädesirölo mesedi, esuimons pölagoli ela <Balaam>, ed epäridikons dub todäl äsä ut ela <Corach>.

12. Etans binons jemodastens pö löfafideds olsik, kefidedans nenplafik, kels bälätons okis it; binons lefogs nenvatik dub viens pazimoföls; binons bims ün fluküp nen fluks, kels edeadons telna e pesäplanons;

13. binons levefs vutik mela, kels löpiojedons as sköm jemodis oksik; binons stels zivegöl, pro kels tops dagikün pakipedons laidüpio.

14. Dö etans, i <Henoch>: velidan de el <Adam>, esagom profetölo: «Ekö! Söl ekömom ko milats saludik okik,

15. ad cödön valanis, ed ad pönön nen-Godanis demü vobods nen-Godik valik, kelis eduinons nen-Godiko, e demü vöds groböfik valik, kelis ons, as sinans nen-Godik, espikons ta om».

16. Etans binons murölans, kels plonons fäti oksik, kels dajäfons ma ledesirs oksik, kelas mud spikon pleidülo, e kels flätons votanis, kelis vilons frutidön okes.

17. Ab ols, o palöfölans! memidolsöd vödis, kelis büikumo paostolans Söla obsik: Yesus Kristus espikoms oles,

18. ibä äsagoms oles: «Ün dels lätik kofans obinons, kels okondötons ma ledesirs sinik lönik oksik».

19. Atans binons utans, kels deteilons okis, binons mens sänsüelik, kels no labons Lanali.

20. Ab ols, o palöfölans! lebumolsöd olis in lekred mu saludik olsik; plekolsöd in Saludalanal!

21. Kipedolsöd olis in löf Goda, spetölo miseri Söla obsik: Yesus Kristus ad lif laidüpik!

22. Sio keliedolsöd ko utans, kels dotons!

23. Savolsöd boso ko dred onis dub tirön onis se fil, bi mutols igo hetön kloti dub dun midik pemiotöli.

24. Lü om, kel fägom ad neletön, das tifalols, ed ad pladön olis neblamiko e ko yub lo glor omik,

25. lo God balik, Saval obas dub Yesus: Kristus, Söl obsik, glor, e mayed, e näm, e nämäd binonsöd bü laidüp, e nu e laidüpio! So binosös!

---------- oOo ----------