Seimna hidog ädabinom. Pitraduton fa ‚Даниил Морозов‘ tü yel 2019id.
Nüpenäds finik tonons so:
Lautan dramatavödema, däsinan ä rejidan: ‚Eh. Nazarov’.
Kämitölatan: ‚M. Drujan’.
Däsinan ä süfülölan: ‚A. Goreva’.
Mastan tefü tonods: ‚B. Fil'chikov’.
Redakans: ‚E. Mikhajlova’, ‚R. Frichinskaja’.
Däsinans ä däsinotafilmels: ‚N. Bogomolova’, ‚A. Abarenov’, ‚M. Voskan'janc’, ‚Eh. Maslova’, ‚V. Zarubin’, ‚S. Dezhkin’.
Koedoms tonön roulis: ‚G. Burkov’, ‚A. Dzhigarkhanjan’.
Dilekan kvipa filmotimekelas: ‚N. Lipnickaja’.
(Seimna hidog ädabinom.mp4, 47,2 MB)
Igor Wasilewski, 2015. Volapük paspiköl.
Volapük paspiköl (1).mp4 (4,51 MB) [15 gustul 2015 yel] Ekö dil balid sökoda obik, keli enemob "Volapük Paspiköl". Stenogram: jonülöd Glidis o Volapükaflens valöpo! Registarot at binon dil balid sökoda nulik, keli vilob nemön "Volapük Paspiköl". Älabob tikamagoti somik, ven flen legudik Daniel ed ob älabobs kolkömi Volapükik tö Ginza, kö äspikobs te Volapüko dü düps tel u kils. Kredob das obs Volapükans nedobs spikön Volapüki nemuiko balna aldeliko. Cedob das yegäd no veüton. Kis veüton-li? Veütos das spikobs Volapüki. Ed ob ekö vilob spikön Volapüki aldeliko. Dönulogö tü dil telid so-panemöla "Volapük Paspiköl". | Volapük paspiköl (2).mp4 (29,1 MB) [20 gustul 2015 yel] Ekö dil telid ela "Volapük Paspiköl". Stenogram: jonülöd Deli gudik, o Volapükaflens valöpo! Atos binon dil telid sökoda obik, keli enemob "Volapük Paspiköl". Adelo bü valikos vilob danön ladöfiko utanis, kels äpenons küpetis vemo siikis pos registarot obik balid. Stad somik gevon obe fredimi gretik e kuradükami ad fövön sökodi at. Danob olis! Adelo i vilob spikön dö din nog bal, sevabo reidob e lilob semikna, das mens ömik logölo bosi nesuemovik, plidons ad sagön: "Atos binon Volapük!" Notod somik dabinon in Danänapük, e ma sev oba, i Sperantapükans plidons ad spikön somikosi. Ab säkäd binon, das do mens et cogons e plonons dö Volapük, no vilons lärnön oni. Balugiko, cedob das if no vilol lärnön püki seimik, no okanol suemön oni. Atos binon gespik oba. Danö e adyö! | Volapük paspiköl (3).mp4 (30,4 MB) [26 gustul 2015 yel] Dil kilid ela "Volapük Paspiköl" ya blümon. Spikob dö stom e yelasäsuns, atna bosilo nevifikumo. Stenogram: jonülöd Glidis, o Volapükaflens! Ekö dil kilid sökoda obik. Äsä logols, reinos adelo. Ed ob viloböv spikön dö stom e yelasäsuns is in Yapän ed in Zänoda-Yurop, samo in Polän u Deutän. Ab balido viloböv mäniotön, das danädü sit legudik gramata Volapükik kanobs fomön nemis yelasäsunas fol me vöds balugik fol e poyümot patik el "üp". Vöds et binons: flor, hit, fluk e nif. E poyümot patik binon el "üp". El "üp" sinifon timi. Seko, go fasiliko, säsun balid binon "florüp", säsun telid binon "florüp", säsun kilid binon "fluküp" e säsun folid binon "nifüp". Ven leigodob yelasäsunis is in Yapän ko yelasäsuns in Zänoda-Yurop, cedob das florüp e fluküp binons sümiks. Dif tefon nifüpi e hitüpi. Nifüp Yapänik binon sofikum, ba pläamü el Hokkaido. Ab hitüp binon lemuik. No plidob hitüpi. Muls badikün binons yulul, gustul e setul. Binos noe hitik, abi luimöfik. Plidob vemo fluküpi, pato novuli e dekuli, bi binos koldülik, ab no nog koldik. Vilob sagön valikanes, utanes kels sufons kodü hit - drinolsös begö! drinedis mödik, e jelolsös olis seimo in jad. Danö e dönulogö! |
Volapük paspiköl (4).mp4 (33,2 MB) [6 setul 2015 yel] Dil folid ela "Volapük Paspiköl", in kel spikob dö nüm setulik Vöga Volapüka yela 2015. Stenogram: jonülöd Deli gudik o Volapükaflens. Ekö nüm setulik gaseda calöfik Volapükanefa, sevabo Vög Volapüka. In jenotem Volapüka ädabinon "Volapükagased pro Nedänapükans". Attimo labobs "Vögi Volapüka", kel binon sonemik "Sirkülapenäd Volapükaflenes Valöpo", e keli äprimom Guvan Ralph bü yels mödik. Attimo Cifal it redakom oni. Äs kösömiko Vög Volapüka labon padis jöl, kanobs reidön vödis Cifala su pad balid, kanobs i reidön yegedi gramatik vemo nitediki fa Vicifal. Yeged at tefon vödidefomamavi e vödadilemavi, fövot ofovon. Obaflanao vilob danön Cifali demü yeged ko nuns dö kolköm Volapükik, keli flen: Daniel ed ob älabobs in zif: Tokyo. Danob oli, o Cifal, i demü mäniot dö filmotüls obik in Volapük. E zuo, kisi votik kanobs-li reidön? Guvan isedom Cifale cogi muadik, keli kanoy reidön su pad jölid löpü nuns. E fino konotils tel, kels binons boso lügiks. Bal konotilas at petiädon "Läb", e konon dö härmit semik vemo pöfik, ab sagatik, e dö vom yunik, vemo jönik, ab neläbik kodü van okik, jikel ävilof tuvön läbi, ifi mutoföv dunön negiti. Vom et no äkanof suemön, das härmit ituvom püdi pla läb, bi no ivilom sukön läbi. Konotil nog bal pälauton fa jilautan Spanyänik: Ana Maria Matute. Tiäd onik binon "Bim Goldik". I konotil at binon lügik. Sevob vio ofinon, ab no vilob sagön osi nu, bi fövot ofovon. Kanobs gekömön lü konotil at posä reidans ufireidons vali. Fino viloböv lüükön, das Cifal ai blümükom i leodi patik padas Vöga Volapüka, dat okanoy bukön gasedi at fasiliko su papür, demü kelos sötobs binön danöfiks. Binos vo vemo plitülik ad labön ati su papür. Danö! | Volapük paspiköl (5).mp4 (21 MB) [16 setul 2015 yel] In dil at sökoda obik spikob dö risataglöp, fidäd balugik. Stenogram: jonülöd Deli gudik o Volapükaflens. Desinob ad koledön bosilo. Binob härbatiman, ed atos sinifon das leno kanob, leno vilob fidön miti. Ab atos binon din vemo gudik pro härbatimans. Binon fided patedik Yapänik - el 'onigiri'. Binädon me risat, laleg sägik plödü risat, laleg luimik ninü risat. Binon vemo benosmekik. Ad maifükön atosi, logolsös begö, dabinons dils. Balido nedoy sävilupön dili balid, poso telidi e fino kilidi. Pötiti gudik! | Volapük paspiköl (6).mp4 (8,65 MB) [20 setul 2015 yel] Balidnaedo gebob is melodi Volapükahüma. Spikob dö tidabuk hiela Johann Schmidt, e reidob konotili tiädü "Monit bisarik". Stenogram: jonülöd Deli gudik, o keslopans Volapüka. Äsä älilobs bü timül äprimob ad lüükön dilädi Volapükahüma. E desinob ad gebön melodi at ai in filmotils obik dönu. Dö kis viloböv-li spikön adelo? Viloböv spikön dö tidabuk Volapükik kel ebinon tidabuk balid pro ob, sevabo buk famik fa hiel Johann Schmidt Deutänapüko pepenöl. Tidabuk at ninädon Volapüki perevidöl keli obs, Volapükans, gebobs attimo. Plidob tidabuki at, bi ninädon setis, fraseodis ä vödemis vemo nitedikis. E labob tikamagoti das kanoböv reidön vödemis somik. As sam plidob vemo konotili bal tiädü "Monit bisarik" fa hiel Hebel. Viloböv reidön vödemi at. Man semik ämonitom su cuk lomio e son okik ästepom futo näi om. Tevan äkömom ed äspikom: “binos negit, o fat! das ol monitol, e son olik mutom golön futo. Labol limedis nämikum ka son.” Fat änexänom de cuk ed äletom soni ad bexänom cuki. Suno tevan votik äkömom ed äsagom: “O hipul! no binos gitik das ol monitol e fat olik mutom begolön vegi futo. Labol lögis yunikum ka fat olik.” Nu bofiks äbexänoms cuki ed ämonitoms dü düp so, jüs tevan kilid äkömom ed äsagom: “O nentäläkt kion! Mens tel seadoms su nim fibik! Vö!, sötoyöd sumön stafi ad deyagön olis de cuk.” Nu bofiks änexänoms de cuk ed ägoloms futo, detiko fat ägolom, nedetiko son ägolom ed in zänod cuk ägolon. Nu tevan folid äkömom ed äsagom: “Vö! binols dabinans bisarik kil! No saidos-li, if tel de ols mutons golön?" Nu fat äkobotanom föfalögis e son pödalögis cuka, täno ädusteigoms dis koap onik letuigi bima, kel ästanon nilü süt ed äpoloms cuki su jots omsik lomio. Somikos okanon jenön, üf demoyöv cedi mena alik. |
Volapük paspiköl (7).mp4 (15,2 MB) [31 tobul 2015 yel] Dil velid sökoda at. Spikob nog bosilo dö tidabuk legudik, pato dabükot nulik se yel: 2013 fa cifal obsik pekoräköl. Stenogram: jonülöd Deli gudik, o Volapükaflens in vol lölik. Vigs lul epasetikons sis filmotil oba büik. Cedob das äbinon tim boso lunik ab kods tel atosa dabinons. Balido ävedob vemo jäfädik ün tobul. Telido, as ämäniotob büo, yelasäsun pebuviköl(???) oba binon fluküp, pato tobul e novul. Ab sevobs gudiko das alyelo, kuratiko ün florüp ä fluküp, mens mödik koldätikons. Aldelo, ven golob lü vob u gekomob lomio, lifädob nemuiko düpis tel in trens lezif 'Tokyo'. Aldelo logob in trens menis, kels kögons u snidons, kluliko labons koldäti. Fino id ob ekoldätikob ed elabob kögi badik, ab nutimo tio äsaunikob e kredob das ko näms gretikum kanob gekömön lü sogod obik. Ed ekö! dil velid. Viloböv nogna mäniotön buki keli plidob, sevabo tidabuki fa hiel Johann Schmidt. Suvo gekömob lü reidam buka at te ad blesis bi asevob valikosi vödema ä gramata in buk at. Bü yels tel i dabükot nulik epubom. Cifal obsik ekoräkom pökis omik ed elüükom bligädis gramatik e vödaliseds tel. Dabükot nulik binon legudik. If oreidols buki at, otuvols das lautan penom suvo dö nat: dajonom valiko flörs e nims distofik. Binos nitedik bi tidabuk at ninädon i vödis kelis bo no neodoy ün lif aldelik. As sam, vöds somik: merul, piak, kukuk, lül, mart e poso viel, bäf, cöl, brat ed igo taim e votiks. Ab if ologols vödis at mödikna fümiko osuemols valikosi. Cedob das buk at labon keinoti semik e dajonon voli timeda et ko lif vilagik in nat ab i ko dins anik negudik. I konots dö badikans pubons ömna. Cedob das lautan enotodom gudiko lülogedälis lifa ettimik. | Volapük paspiköl (8).mp4 (13,4 MB) [21 novul 2015 yel] Dil jölid sököda obik, kö spikob dö 'Volapükagased pro Nedänapükans', hiel Albert Sleumer, e cal obik nulik as kadäman. Stenogram: jonülöd Deli gudik, o Volapükaflens, ä benokömö lü broadöp obik kö kanols lilön Volapüki vo paspiköl. Sevädob das dabinons filmotüls ä tops votik kö kanoy reidön Volapüki ab jinos obe das broadöp obik binon top teik kö kanoy lilön Volapüki paspiköl ze nemediko. Äsagob "nemediko" ab jenöfo do viloböv mekön filmotülis obik Volapüko suvikumo. Binob vemo jäfädik e no labob timi saidik, kludo desinob ad jafön filmotülis nulik nemuiko balna almuliko. U suvikumo if omogos. Adelo viloböv spikön dö dins tel. Sevabo balido viloböv spikön dö "Volapükagased pro Nedänapükans". Jenöfo gased at ebinon gased noe pro Nedänapükans abi pro Volapükans voik, bi elabon vödemis in Volapük pepenölis. Cedob das if vilobs binön Volapükans vemo gudiks, nedobs labön noli vemo gudiki jenotema Volapüka. E kredob das "Volapükagased pro Nedänapükans" binon dil veütikün jenotema Volapükik Volapükamufa. Is vilob danön ladöfiko utanis, kels edunoms valikosi ad pübön dokumis distöfik Volapükik in bevüresod. Ma sev oba, Cifal ekopiedom nümis lemödik ela "Volapükagased pro Nedänapükans" e volapükan fefik e fiedik Oleg se Rusän ejafom bevüresodapadi kö ekonletom dokumis vemo mödiks. Vilob danön olis. "Volapükagased pro Nedänapükans" kösömiko no elabon fotografotis. Ab nüms anik elabons fotografotis, ed as sam labob is nümi bal: binon nüm kilid se yel milzültumfoldegzül. E su pad balid kanols logön mani vemo famiki: binon hiel Albert Sleumer. Hiel Albert Sleumer ebinom Cifal telid pos Datuval e poso evedom stimacifal Volapükanefa e Kadäma. Dokums e vödems somik binons dins vemo nitediks e veütiks pro nol obsik jenotema Volapüka. E telido din nog bal. Viloböv pleidülön bosilo bi bü brefüp ävedob kadäman Volapüka. Binob kadäman sis prim novula, sis del balid novula e vilob notodön danis ladöfikün Cifale, Vicifale e Kadäme demü cälam oba ad kadäman. Bü brefüp ägetob de sog bevünetik Volapüka de Cifal dalebüdi calöfik kel sagon das binob kadäman. Danis ladöfikün. Dönulogö in dil sököl ela "Volapük paspiköl". | Volapük paspiköl (9).mp4 (42,9 MB) [24 dekul 2015 yel] In dil zülid ela "Volapük paspiköl" vipob valikosi gudikün Volapükanes valik pötü Kritidazäl e Nulayel: 2016; spikob dö nüm dekulik ela "Vög Volapüka", e reidob fonuni se "Gramat Volapüka" fa Dokan: Arie de Jong. Stenogram: jonülöd Deli gudik o Volapükaflens digik valöpo. Adelo binos del teldegfolid dekula klu kritidazäl. Stom dekulik in Yapän, in topäd cifa Tokyo e züamöpa lölik cifa at binon vemo jönik alyelo. Äsagob "vemo jönik" bi no nifos, no binos koldik, ä do otüpo suemob das mens mödik cedons das kritidazäl nen nif no kanon binön kritidazäl veratik. Obaflanau (???) vilob sagön das no plidob nifi so vemo. Buikob stomi somik. Kludo, o Volapükaflens digik, vilob vipön oles ed olikanes: famüles olsik e flenes olsik, valikosi gudikün pötü kritidazäl e nulayel okömöl. Nulayel blinonös obes valik, Volapükanes, benoseki gretik e plöpi fredik in Volapükamuf obas. Suvo spikob dö gased obsik sevabo "Vög Volapüka". Ini nüm dekulik ela "Vög Volapüka" kanoy reidön yegedi bal dö ob, bi bü brefüp ävedob kadäman soga bevünetik Volapüka. Nog balna vilob notodön danis ladöfikün Volapükanes votik. In nüm dekulik ela "Vög Volapüka" kanoy i reidön yegedis votik tel dö söls Ralph Midgley e Brian Bishop. Söl Brian Bishop, kel ebinom Cifal Volapükanefa büo, pecälom ad Stimacifal. E söl Ralph Midgley, kel ebinom Guvan Volapükanefa, pecälom ad Stimakadämal soga bevünetik Volapüka. Dalebüds tel at ekomöns de Cifal obsik: söl Hermann Phillips. E din nog bal. Plidob ad reidön mödikna bukis Volapükik kil: binons tidabuks e gramatabuk. Spikob dö tidabuk Nedänapükik fa Dokan Arie de Jong, tidabuk Deutänapükik fa söl Johann Schmidt e "Gramat Volapüka" fa Dokan Arie de Jong lölöfiko in Volapük pepenöl. "Gramat Volapüka" no binon buk fasilik. Cedob das ad vedön Volapükan vemo gudik no saidos if kanobs mekön setis, neodobs noli patik dö gramat. As sam dö din somik: jenöfastad, mögastad, säkastad, dunalefom, sufalefom, bidirs, letims, balsets, plusets, koboädavöds, koboyümavöds e votiks. Dokan Arie de Jong epenom fonuni primü buk at in eplenom vio e kikodo ibevobom gramati Volapüka. Viloböv reidön fonuni at: "Gramat at danädon davedi oka vipe slopanas fiedik anik Volapüka ad dönulifükön volapüki mekavik at. Dinäds difik ekodons das mödikans edeflekons okis de Volapük, e das pük at eperon mödikosi fluna okik. Bal kodas atosa sio ebinon fomam vödas, e pato fomam koboyümavödas. Pö fomam vödas nulik e pö fomam koboyümavödas, el „Schleyer”: datikan letälenik Volapüka sevabo ägebädom brefükamis somik, das vöds at tefü licin okas ivedons fikuliko sevädoviks. Dub atos vöds nulik Volapüka ivedons fikuliko memidoviks ed älonülons memäle flagis vemo töbikis. Kludo if ävilobsöv, das Volapük ödageton dönu in kosäd bevünetik pladi, kel duton lü ok, e keli i meriton, täno mu balido vödastok Volapüka ömutonöv paxamön e pamenodön utöpo, kö özesüdosöv. Ab bi fomam vödas klülo söton pastabön dub noms gramatik kuratiko pelonöls, id äzesüdos ad revidön staböfo gramati Volapüka. Bligädi at, sevabo: e revid gramata e revid vödas Volapükik, edunikob. Bü del kildegbalid (31id) mäzula ela milzültumteldegzül (1929), kludo tü timül mö yels ebo luldegs pos datik Volapüka fa Johann Martin Schleyer, vobod oba äblümon. Ün prilul ela milzültumteldegzül (1929) evisitob söli: Profäsoran Dokan Albert Sleumer, cifal Volapükanefa ä dilekan Volapükakadäma ad jonön ome vobodi oba, ed ün setul yela ot obs bofik evegobs lü „Wienacht” in Jveizän ad bespikön us ko söl: Jackob Sprenger vobodi oba e dinädis votik Volapüki tefölis. Pläamü dins anik äkanoy baicedön tefü ceds obik. Votükamis anik, kels äzesüdons, elüblinob ini gramat ed ini vödabuk, ven äbinob dönu in lomän oba, sodas gramat at gegivon utosi, kelosi elonobs kilo fifümiko pö kobikam obas in „Wienacht” de del degvelid (17id) jüesa del degzülid (19id) setula ela milzültumteldegzül (1929). Dins anik, tefü kels nog älaboy vipi patik, pomäniotons in noets. Säkäd, va pük valemik paneodon, is no nedon pabespikön. Kosäd bevünetik gianagretik, ted bevünetik, tefs bolitik bevünetik vero zesüdükons dalabi püka bevünetik. Neod at ädabinon ya de tims vönädikün e päfölon jünu dub geb pluuneplu valemik bala pükas lifik. Ün nutim sevädiko plä latin, Fransänapük e Linglänapük pagebons as volapüks. Geb at bala u mödikuma pükas lifik as volapük, pasenälon ebo fa lödans reigänas votik, kelas püks i paspikons fa balionats reigäbas, as pödiopladam okas it ed as privilegam länas ut, kelas püks pagebons as volapüks. Pato nü netäliseved netas difik glofon aiplu senäl at; dodon aiplu ad givülön bali pükas lifik stadi privilegik volapüka. Lä atos nog dod binon, das pük lifik alik i binon fikuliko lärnovik. Löns mödik, kelis pük alik labon, kodons, das neodoy studi yelas mödik, büä kanoy spikön e penön kuratiko püki et. Dods at ebo paleyilons fasiliko dub volapük mekavik. Pük somik kanon pastukön somo, das binon fasiliko lärnovik. Dub atos dod gretik moikon, sevabo: töbid gretik e tim lunik, kelis neodoy ad lärnön bali pükas dabinöl. Zuo pö dabin püka bevünetik valemiko pageböla, pük lifik nonik binon in stad privilegik; ad kompenön in kosäd bevünetik, net alik olabon pö jenet somik bligi ad lärnön volapüki mekavik bevünetik bal at. „Ab atimo mekavapüks so mödiks dabinons; kini mekavapükas at omutoy täno gebön as kosädapük bevünetik?” osäkoy. Pro geb at, ma ced oba, pük mekavik te bal kanon pademön, sevabo: Volapük, pük fa Johann Martin Schleyer pedatiköl. Volapük ga binon tefü binod oka so balugik e labon süperodis so mödikis, das pük votik no bal kanon pluön, mu te kanon leigön leigodü on. Zuo plak eblöfon, das Volapük binon lölöfiko gebovik pro kosäd bevünetik. In bukil ün milzültumteldegvel (1927) pepüböl dö el „Interlingua” (bal mätedianas mödik Volapüka) samo nun sököl binon: „Ün miljöltumjöldegzül (1889) in Yurop, Siyop, Frikop, Merop e Stralop Volapükaklubs teltumjöldegkil (283), Volapükitidans pidiplomöl plu milmältum (1600), geidabuks kiltumdegmäl (316) Volapüka e gaseds Volapükik teldeglul (25) ädabinons.” If viloyöv kludo dagebön jenöfiko püki bal, kel pagebon da vol lölik as yufamedöm bevünetik, täno geboyös te Volapüki! Lü Volapük gität duton ad fölön neodi at. Pos steifs nensekik dü tumyels mödik ad jafön kosädamedömi bevünetik, Volapük ga binon pük mekavik balid, kel ebluföfon ad binön plago gebovik pro kosäd bevünetik, e kel stadon lölöfiko neudiko tefü länapüks difik. Pül nitedäla pro Volapük ün timül at no nedon binön neletian ad propagidön püki at. Pluna ga in jenav nolavas ejenos, das tuvot nolavik pas pos yels mödik glömäda ädageton digidi, keli ämeriton. Tefü lebuk it, vilob küpetön is, das gramat at no binon gramat balid, kel pelauton löliko in Volapük. Sevabo ün miljöltumjöldegzül (1889), tü del kildegbalid (31id) mäzula, gramat fa Schleyer it pelautöl epubon tiädü „Glamat popikokatekik Volapüka.” (Gramat kategöfik Volapüka). Binos vipabik, das Volapükagramats in länapüks difik pulautöls opubons. Gramats in natapüks polautöls no nedons binön tradutod lölöfik gramata at. Bevoban gramata somik klüliko binon lölöfiko lelivik ad lautön ati, soäsä on it cedon osi as zesüdik. Mod bevoba klüliko sekidon zuo de pük, in kel lebut somik palauton. Kanos jenön, das pö reid gramata at ba dod u küpet seimik süikon; pö jenet somik obinos gudik, das reidan lesevädükon oke balido prinsipis, kels pelasumons in gramat at. Begob ye ad no mekön nensüeniko dodis. Pük alik labon pükalönis, tefü kels ekösömikoy. Ven okolkömoy in Volapük pükaloni seimik de pük okik distidiki, täno bo obuükoy löni lomänapüka oka bu et Volapüka e bo ocedoy, das obinos-la vipabik ad lasumön ati ini Volapükasit. Pö stad somik betikoyös ye, das liman neta votik kanon labön vipis votik! Binos vo nemögik ad fölön vipis somik. Güö! Volapük söton labön nomis lönik seimiko tefü natapüks livätikis. Pas somo odalobs spetön, das pükalöns pükas difik no poloveblinons ini Volapük e das nets difik openons Volapüki ön mod te bal. Spelob, das Volapük odageton dönu flenis mödik, e das atans pö stud datikota sublimik at ela Schleyer osenälons juiti leigamödotik äs ob esenälob pö bevob e gramata at e vödabuka Volapüka. Dokan Arie de Jong, Kadäman Volapüka." |
Ralph Midgley, 2013. Pötü del 1id prilula.
(04_ton_prilula_2013.mp3, 2,71 MB)
Stenogram: jonülöd
O Volapükaflens valöpo!
Ad sevön fruti püka bevünetik, te neodoy ad küpedön kaoti pükik adelik da vol lölik; nendoto ad binön slopan püka mekavik, mutoy binön frediman. Badiman jenöfo no kanon jäfädön me dial somik. Cedü badimans, fredimans binoms pösods fopik, kels logoms lifi äs pölaced, e kel ün del seimik okömöl otüvom midini otosa.
Ab frediman veratik no binom pösod somik. Do gudiko sevom fikulis lifa valemik, lif oma binon veratiko jafik. Büologom dinis badik okömöl e steifülom ad nedrefön onis. Finü lif, tuvom koteni dibik, e pakom valöpo fredi.
Vöds at kanons bo bepenön lifi Volapükana veratik. Do dial it binon legudik, dasevom, das nets nämädik vola neföro odaoptons oni; too sevom, das binon dial lejönik, e kodü atos löfom oni.
Fredim binon väl - väl keli man sapik nenzogo välom ven binom yunan. Väl at slüdon lüodi lifa omik. Badimans, votaflano, vedoms künidiks, e suvo no tuvoms seimo gudi.
Hiel Goethe äsagom, das blig balid menas lo nilädan binon ad fredön. I no glömobsös, das hiel Heraklit äkredom, das bad muton dabinön kobü gud. Seko badimans i mutoms lödön su tal ot kobü fredimans. Sekü atos, keliedobsös ko utans, kels mutoms sufön somödo.
Ekö buäd pro slopans Volapüka - mutons binön ai fredimans!
Valikosi gudikün oles ed likanes sedom.
Ralph.